Scaldaments mobils el liber (“bulius da scaldar”, radiaturs, radiaturs d’infratgietschen e.a.v.)

Situaziun da partenza
Tenor las prescripziuns d’energia dil cantun Grischun eis ei mo lubiu da duvrar scaldaments mobils el liber per intents commercials, sche l’emissiun da CO2 caschunada vegn cumpensada. Sco scaldaments mobils el liber crodan en special ils schi numnai “bulius da scaldar”, cundrez da scaldar per tendas (per exempel exposiziuns, events etc.) era radiaturs e radiaturs d’infratgietschen. Per attestar l’admissibladad dall’utilisaziun ston ils scaldaments mobils el liber vegnir muni cun ina ni pliras vignettas.

Cumpetenza
Per emetter las vignettas ein las vischnauncas cumpetentas.

Variantas per survegnir ina vignetta
Varianta 1: Il possessur cumpra ina ni pliras vignettas tier la vischnaunca.
Varianta 2: Il possessur sa retrer gratuitamein ina vignetta tier la vischnaunca, sch’el
• muossa si che l’emissiun da CO2 che vegn caschunada directamein ni indirectamein d’in apparat che funcziunescha cun fossils carburonts ni cun electricitad vegn cumprovadamein cumpensada d’ina organisaziun ch’ei specialisada per quei (p.ex. myclimate), ni
• cumprova ch’il consum d’electricitad d’in apparat electric vegn cumpensaus cun retrer electricitad ch’ei vegnida producida cun energias regenerablas (attestaziun dall’ovra electrica).

Varianta 1
Il prezi dalla vignetta importa 60 francs. Apparats entochen e cun ina prestaziun da scaldar maximala da 14 kilowatt (kW) ston vegnir muni cun ina vignetta per apparat. Sche la prestaziun da scaldar maximala d’in apparat surpassa 14 kilowatt drovan ins ulteriuras vignettas, dependent dalla forza digl indrez da scaldar.

Varianta 2
En cass d’apparats che funcziuneschan cun fossils carburonts ni cun electricitad cun ina prestaziun tochen e cun 14 kilowat (kW) sto vegnir cumpensada ina tonna CO2 per onn. Sche la prestaziun da scaldar maximala d’in apparat surpassa 14 kW ston pliras tonnas CO2 dependet dalla prestaziun maximala vegnir cumpensadas. Silmeins 20 pertschien dall’emissiun da CO2 ston vegnir cumpensai en Svizra. En cass d’apparats electrics eis ei era pusseivel da cumprovar ch’ei vegn retratg mintga onn silmeins 4’500 uras da kilowatt (kWh) d’electricitad ch’ei vegnida producida cun energias regenerablas, e quei per mintga apparat entochen e cun ina prestaziun da scaldar maximala da 14 kW.

Las vischnauncas ston surlaschar il recav dalla vendita dallas vignettas ad in’organisaziun ch’ei specialisada per la cumpensaziun da CO2.

Valeivladad dallas vignettas
La vignetta vala mintgamai in onn (igl 1. da settember entochen ils 31 d’uost). L’obligaziun da cumprar ina vignetta exista naven dall’emprema gada ch’igl apparat da scaldar mobil vegn mess en funcziun ella perioda da valeivladad respectiva.

Disposiziuns penalas
Sche l’obligaziun da cumprar ina vignetta vegn buca observada, ha la vischnanca il dretg da prender sancziuns resp. d’incassar multas (art. 36 f. dalla lescha d’energia dil cantun Grischun).