Tenor las leschas vertentas ein persunas che prendan dimora en vischnaunca obligadas d’annunziar lur arrivada tier la canzlia communala enteifer 14 dis cun deponer ils suandonts documents:

Burgheis svizzers cun dimora permanenta:

• Scret da patria
• Attest da famiglia
• Mussament da segirada dalla cassa da malsauns

Burgheis svizzers cun dimora jamnila:

• Certificat d’origin dalla vischnaunca da domicil

Burgheis da tiaras jastras:

• Passaport ni carta d’identitad
• Legitimaziun d’jasters (sche avon maun)
• Damonda per lubientscha d’jasters A1/B1
• Mussament da segirada dalla cassa da malsauns

Ils formulars per las damondas sco era ulteriuras informaziuns anfleis Vus sin la pagina d’internet digl uffeci da migraziun e da dretg civil dil cantun Grischun.

Partenza
Persunas che bandunan la vischnaunca da Falera han d’annunziar quei avon la partenza cun indicar il datum ed il liug da partenza.

Midadas da casa
Midadas d’adressa enteifer la vischnaunca da Falera ein medemamein d’annunziar alla canzlia enteifer 14 dis. Quella obligaziun vala era per midadas enteifer il medem baghetg.

Obligaziun d’annunzia per locaturs
Vinavon ein era ils locaturs da casas, habitaziuns, combras, tegias eav. obligai d’annunziar alla canzlia mintga arrivada e partenza da locataris.