Nus selegrein medemamein da saver dar a Vus informaziuns impurtontas e nizeivlas sur da nies vitg grazia agl internet e quei duront 24 uras a di.
Documents multifars ein vegni elavurai e stattan ussa adina spert e levamein e da tut temps a Vossa disposiziun. Ultra da quei vegnin nus a publicar adina puspei rapports actuals ed informaziuns.
Igl internet duei daventar in mied d’informaziun actual dalla administraziun communala.
Gia avon varga 3500 onns – duront il temps da bronz – avdavan carstgauns sin il crest Mutta a Falera. Ils pli impurtonts cats archeologics san ins admirar oz el Museum retic a Cuera. Tier quels s’audan ina guila cun rudiala imposanta, uaffens da bronz e cheramica che lai concluder che las habitontas ed ils habitonts dil crest hagien giu contact cun la populaziun el nord ed el sid dallas alps. La baselgia da S. Rumetg – cun siu clutger dil 13avel tschentaner – ei il monument istoric caracteristic da nies vitg.
Romontsch tschintschein nus mintga di. Falera ei liug da lavur, cunzun denton liug da domicil e da vacanzas. Buna qualitad da habitar. Gronda purschida da passentar il temps liber. Ir cun skis. Viandar. Ir cun velo. Esser activs ni – anflar siu ruaus.
Era quei ei Falera.
Haveis queidas sin dapli?
Falera sveglia emoziuns, sentiments, impressiuns. Quei san ins denton tut mo sentir persunal – buc egl internet – mo a Falera, direct e mo leu.
Nus selegrein da s’entupar cun Vus.
Seigies cordialmein beinvegni.
Norbert Good, president communal