Project per novas zonas da baghegiar per indigens
Il terren da baghegiar ei daventaus scarts a Falera. Per l’ina eis ei vegniu construiu bia ils davos onns. Per l’autra prevesa la nova politica territoriala il mument neginas enzonaziuns da terren da baghegiar – ils vitgs duein vegnir concentrai. Quei ei ina gronda sfida – ton dil pugn da vesta dalla planisaziun dil territori sco era dil pugn da vesta social. Malgrad quellas circumstanzias vul la vischnaunca da Falera far tut il pusseivel per possibilitar in dacasa allas persunas che vesan lur futur en nies vitg.
La vischnaunca politica, la vischnaunca burgheisa e la pleiv disponan d’entginas parcellas aunc buca surbaghegiadas. Ussa vala ei da planisar quellas precautamein. En quei senn fa la vischnaunca ponderaziuns davart fuormas futuras da surbaghegiar e da habitar.
A caschun dalla proxima radunonza communala informescha la vischnaunca corrispundentamein e presenta las ideas arisguard il project per novas zonas da baghegiar per indigens.
En connex cun quei project vul la suprastonza communala sclarir, sch’igl interess per terren da baghegiar ed eventualmein era per habitaziuns per tscheins per indigens ei avon maun.
Per saver giudicar sch’ei dat in interess per terren da baghegiar ed eventualmein era per habitaziuns per tscheins per indigens, vul la suprastonza dar la pusseivladad allas persunas interessadas da s’annunziar tier la vischnaunca. Perquei prendein nus bugen encunter intenziuns e giavischs da persunas interessadas tochen ils 15 da fenadur 2021, e quei en scret all’adressa dad e-mail info@falera.net.
