Vischnaunca da Falera revisiun dalla planisaziun locala – prolungaziun dalla zona dalla planisaziun
Ella vischnanca da Falera ei actualmain en vigur ina zona da planisaziun per la revisiun dalla planisaziun locala ch’ei vegnida prolunghida per l’emprema gada ils 20 da fevrer 2023 (publicaziun dils 8 d’avrel 2021 resp. dils 23 da mars 2023). Sin basa d’art. 21 dalla Lescha davart la planisaziun dil territori per il cantun Grischun (LPTGR) ha la suprastonza communala decidiu alla seduta dils 9 da december 2024 da prolungir la zona da planisaziun ad interim per ulteriurs dus onns entochen ils 8 d’avrel 2027 sco suonda:
Intent dalla zona da planisaziun
a) examinar ed adattar las zonas da baghegiar (zonas da habitar, zonas mischedadas e zonas dil center) tenor las directivas d’art. 15 al. 1 e 2 dalla Lescha federala davart la planisaziun dil territori (LPT) e dil plan directiv cantunal – habitadi (PDC-H);
b) realisar las ulteriuras directivas tenor art. 15 LPT sco era dil PDC-H, en special quei che risguarda la promoziun d’in svilup architectonic d’aulta qualitad dil habitadi viers anen;
c) realisar las directivas dil LPTGR revediu.
Ella zona da planisaziun astga vegnir fatg nuot che savess engrevegiar ni cuntrariar la planisaziun nova. En special astgan projects da construcziun vegnir lubi mo sch’els cunterfan buc allas planisaziuns e prescripziuns vertentas ni allas planisaziuns e prescripziuns novas previdas (art. 21 al. 2 LPTGR).
Il Departament d’economia publica e fatgs socials ha approbau la prolungaziun dalla zona da planisaziun cun decret dils 4 da mars 2025.
La suprastonza communala seresalva da concretisar da tut temps la zona da planisaziun tenor il stan da planisaziun mintgamai actual resp. d’adattar ella al stan da planisaziun actual.
La relaschada dalla zona da planisaziun sa vegnir contestada cun recuors da planisaziun alla regenza dil cantun Grischun enteifer 30 dis suenter la publicaziun (art. 101 al. 1 LPTGR).
