Falera – sesentir da casa
Economia / turissem / agricultura
Falera ei interregiunalmein enconuschent sco destinaziun turistica. Nies gudogn principal seresulta dil turissem. Nus promovin l’idea dil turissem regiunal. Nus lein mantener ils plazs da lavur existents e promover novs plazs da lavur. Per l’economia lein nus porscher bunas cundiziuns localas.
Traffic / ambient / energia / provediment e dismessa
La natira ed igl ambient fuorman nies pli impurtont capital. Nus tractein el cun cunscienta responsabladad e duvrein el cun precauziun ed a liunga vesta. Nus s’engaschein pil manteniment e per la promoziun d’in bien provediment e d’ina buna dismessa.
Social / scolaziun e formaziun / sanadad / segirtad publica
Nus lein risguardar il beinstar da giuven e vegl. Nossas finamiras ein da mantener la scola dil vitg e da promover il nivel da scolaziun e formaziun. Ina buna scolaziun e formaziun era per carschi, in ambient social e segir ed in provediment da sanadad public che funcziunescha bein fuorman ulteriuras petgas impurtontas.
Cultura / temps liber / recreaziun / sport
La cultura ei nossa fermezia. Nus promovin la varietad culturala, nos usits e rinforzein cheutras l’identificaziun dalla populaziun cun la vischnaunca da Falera. Nus lein porscher als indigens ed als hosps bunas cundiziuns per la cultura, pil temps liber, per la recreaziun e pil sport. La construcziun dils megalits e la baselgia da s. Rumetg ein attracziuns unicas.
Administraziun / autoritads / collaboraziun denter vischnauncas e corporaziuns
Grazia a structuras administrativas conformas al temps savein nus adina reagir sin midadas. Las autoritads ein engaschadas, motivadas e creeschan premissas per mantener la vischnaunca a moda efficienta. Nus promovin ina collaboraziun activa cun autras instituziuns.
Finanzas
La finamira ei ina sauna economia da finanzas. Ils mieds ch’ein avon maun tractein nus cun cunscienta responsabladad.