Publicaziuns ufficialas

Optional

Rimnada da rauba blocconta

Sonda, ils 7 da november 2026 dallas 8.00-11.00 uras sa vegnir dismess rauba blocconta.

Ils containers per dismetter la rauba vegnan tschentai si sil parcadi Fandrels.

Sco rauba blocconta da dimensiun pli gronda che sa vegnir dismessa gratuitamein valan rumians da casa ch’ins sa buca surdar al survetsch da rimnada regular, perquei ch’els ein u memia gronds ni memia grevs.

Ils suandonts rumians astgan en mintga cass buca vegnir dismess el rom da rimnadas da rauba blocconta:

rumians da casa e rumians industrials, material d’embelladi sco plastic ni stiropor, il plastic dallas ballas da silo, lenna da construcziun, vanzadiras da lenna, teppis stendi, material d’isolar, liquids, ieli, colurs, crappa, tievlas, battarias dil tenercasa ed autra rauba semeglionta.

Grondas dimensiuns da rumien bloccont che seresultan ord rumidas, spazzadas ni renovaziuns da casas eav. san buca vegnir dismessas cun la rimnada dalla vischnaunca.

Ella vischnaunca da Falera sa en connex cun la rimnada da rauba blocconta vegnir dismess aunc supplementarmein las suandontas caussas:

apparats electrics                                      gratuit
batterias da motos                                    CHF 5.00 per toc
batterias d’auto pign/grond                       CHF 10.00/20.00 per toc
pneus da privats senza gaveglias            CHF 5.00 per toc
pneus da privats cun gaveglias                CHF 10.00 per toc

Quella rauba vegn dismessa separau dalla rauba blocconta entras ils luvrers communals.

Ils luvrers communals han l’incumbensa da visar anavos rauba che corrispunda buca als criteris da rumien bloccont.

Nus supplichein per enconuschientscha.

Rumida da neiv sin vias da meglieraziun

A privats eis ei scumandau da far ora la neiv sin vias da meglieraziun. La suprastonza communala sa dar lubientschas extraordinarias.Tier beins purils habitai suronn ord la zona da baghegiar procurescha la vischnaunca per la rumida dalla neiv. Tala succeda denton en secunda prioritad. Ils cuosts ein da surprender dils pertuccai. Per purs che pervesan lur animals sin beins buca habitai ord la zona da baghegiar sa la suprastonza communala en cass da basegn far excepziuns e decider sut tgei cundiziuns ch’ina rumida sa vegnir fatga. Per che nus seigien semtgei sigl unviern supplichein nus il purs pertuccai da s’annunziar a scret tier la canzlia communala entochen ils 8 da november 2026 cun indicar nua e per tgei temps ina rumida fuss necessaria.

Tagliar plontas e caglias suenter las vias da meglieraziun

Tenor artechel 4 a) dil reglament pil manteniment dallas ovras da meglieraziun dalla vischnaunca da Falera ston tut las scarpas per liung dallas vias da funs vegnir cultivadas gratuitamein dil cunfinont (segar, tagliar caglias e roma etc.). Nus supplichein perquei tuts possessurs da terren da mirar che plontas e caglias seigien tagliadas anavos aschia che quellas creschan buca sur ils cunfins ellas vias da meglieraziun. Quellas lavurs ston vegnir exequidas entochen ils 31 d’october 2026. Suenter quei termin vegnan ils luvrers communals a far las lavurs necessarias sin cuosts dils proprietaris. En cass che las lavurs san buca vegnir exequidas entras ils luvrers communals vegnan quellas surdadas ad ina fatschenta dil contuorn. Era quels cuosts ston vegnir surpri mintgamai dils proprietaris pertuccai

Tagliar plontas e caglias
Tenor artechel 53 dalla lescha da baghegiar dalla vischnaunca da Falera supplichein nus tuts proprietaris da terren da tagliar anavos caglias e roma che vargan ora en vias publicas, sinaquei ch’il traffic e la rumida da neiv vegnien buca impedi. Nus supplichein era da risguardar che cazzolas e signalisaziuns da via sco era hidrants eav. ein da deliberar da caglias e roma. Caglias e roma sco era ulteriuras emplontaziuns (cotoneaster eav.) ein da tagliar anavos sin in’altezia da 4.5 m sur via e cun ina distanza da minimum 50 cm naven dalla via communala. Nus supplichein privats, administraziuns e pedels da casas da vacanzas da mirar che quellas lavurs vegnan exequidas entochen ils 31 d’october 2026. Suenter quei termin vegnan ils luvrers communals a far las lavurs necessarias sin cuosts dils proprietaris. En cass che las lavurs san buca vegnir exequidas entras ils luvrers communals vegnan quellas surdadas ad ina fatschenta dil contuorn. Era quels cuosts ston vegnir surpri mintgamai dils proprietaris pertuccai.
Damondas da baghegiar 16-10-2026
  • Nr.
    2026-0028
  • Petent
    Gian Arpagaus
    Malanserstrasse 22
    7307 Jenins
  • Proprietari da terren
    Fargliuns Arpagaus
    Gian Arpagaus e Josef Arpagaus
  • Architect/Representant
    Tobias Anderegg Architekten
    Falkenweg 4
    9034 Eggersriet
  • Baghetg
    Disfatga clavau e construcziuns accessoricas
    GVG Nr. 250, 250-A, 251
  • Damondas supplementaras
    –
  • Parcella/zona
    330, 331, 332 | Dorfzone
  • Quartier/Via
    Via Principala 20.1, Via Principala 20.2, Via Principala 20.3
  • Termin d’ exposiziun
    16.10.2026 – 05.11.2026
  • Protestas
    Concernent il dretg public ein da far a scret duront il temps d’exposiziun alla suprastonza communala.
    Investa dils plans sa vegnir priu sin canzlia communala | Uffeci da baghegiar Laax, Center Communal, 7031 Laax.

  • Nr.
    2026-0028
  • Petent
    Gian Arpagaus
    Malanserstrasse 22
    7307 Jenins
  • Proprietari da terren
    Fargliuns Arpagaus
    Vischnaunca politica Falera
  • Architect/Representant
    Tobias Anderegg Architekten
    Falkenweg 4
    9034 Eggersriet
  • Baghetg
    Construcziun nova d’ina casa dubla da pliras famiglias cun garascha sutterrana
  • Damondas supplementaras
    •Damonda da permissiun da la polizia da fiug
    • Damonda per plazzas da protecziun obligatoricas che ston buca vegnir construidas
    • ANU: Damonda da permissiun per ina pumpa da scaldar cun sondas geotermicas
  • Parcella/zona
    331, 332, 432 | Dorfzone
  • Quartier/Via
    Via Suriert 4
  • Termin d’ exposiziun
    16.10.2026 – 05.11.2026
  • Protestas
    Concernent il dretg public ein da far a scret duront il temps d’exposiziun alla suprastonza communala.
    Investa dils plans sa vegnir priu sin canzlia communala | Uffeci da baghegiar Laax, Center Communal, 7031 Laax.
Obligaziun da far pumpiers 2027

Tenor lescha da pumpiers dalla vischnaunca da Falera ein per regla umens e dunnas cun domicil ella vischnaunca da Falera obligai da far pumpiers.

Dils habitonts che vivan en ina lètg buca separada ei sulettamein in dils partenaris obligaus da far pumpiers. En quei cass sedrezza il cuoz dall’obligaziun da far pumpiers tenor la vegliadetgna dil conjugal che gudogna il pli bia.

Tenor las disposiziuns executivas tier la lescha da pumpiers dalla vischnaunca da Falera entscheiva l’obligaziun da dar pumpiers egl onn, el qual il 20avel onn da naschientscha vegn cumplenius. L’obligaziun da far pumpiers finescha alla fin digl onn (31-12), el qual il 42avel onn da naschientscha vegn cumplenius.

La taxa da basa per la taxa da cumpensaziun munta per obligai da far pumpiers cun domicil en vischnaunca CHF 350.—/onn. Tier domicil jamnil cun domicil en vischnaunca munta la taxa da basa per la taxa da cumpensaziun CHF 100.—/onn. Tier arrivada ni partenza duront igl onn calendar vegn la taxa incassada pro rata tenor il cuoz dil domicil. Per dimorants duront l’jamna succeda l’incassament medemamein proporziunalmein tenor il cuoz dalla dimora.

Persunas che prestan gia survetsch e lessan pagar niev la taxa da cumpensaziun enstagl da prestar survetsch activ duein s’annunziar a scret entochen ils 15 da november 2026 tiel cumandant da pumpiers.

Persunas ch’ein obligadas da far pumpiers e che lessan prestar survetsch san emplenir ora il formular d’annunzia online silla pagina d’interent dalla vischnaunca Laax (www.laax-gr.ch/pumpiers – annunzia pil survetsch da far pumpiers).

Per ulteriuras informaziuns stat il cumandant da pumpiers, Gabriel Walser bugen a disposiziun (feuerwehr@laax-gr.ch).

Ils 6 da november 2026 allas 20.00 ha liug la sera d’informaziun el depot da pumpiers Laax. Leu vegn informau sur dallas incumbensas dils pumpiers. Vegni seprasvi!

Il cumandant da pumpiers

Supplicas actualas ed informaziuns dalla vischnaunca da Falera

Bugen nezegein nus quella caschun per informar Vus cuortamein davart svilups actuals, intents planisai e supplicas impurtontas en nossa vischnaunca:

  • Protecziun da carstgaun, natira ed animal – Lescha davart la limitaziun da fiugs artificials
    Nies vitg ruasseivel e colligiau culla natira sedistingua entras in’aulta qualitad da viver. A Falera vala ina lescha communala per restrenscher fiugs artificials. Cunzun duront ils meins schetgs dalla stad exista in prighel da fiug augmentau per cuorts, uauls e baghetgs historics. Nus supplichein da setener adina vid quei scamond per schurmegiar carstgaun, animals da casa, animals selvadis e natira. Tut tenor la situaziun dall’aura sa la suprastonza communala situativ ordinar ulteriuras mesiras da protecziun. Bien engraziament per Vies risguard!
  • Manteniment dalla valur da nossa infrastructura – Sanaziuns d’ovras e vias
    Las lavurs da sanaziun vid la Via Samun e la Via Prau da Cuort stattan cuort avon la finiziun: Igl onn 2027 vegn la cuvrida finala montada. Pil rest digl onn 2027 ein neginas ulteriuras lavurs da construcziun vid vias previdas. Naven da 2028 ei la sanaziun dalla Via Chistiala planisada. Davart andaments da construcziun exacts ed eventualas restricziuns temporaras informein nus Vus secapescha ad uras.
  • In cun l’auter sin via – tener tgauns & ambient schuber
    Tgauns ein cordialmein beinvegni a Falera! Per che la convivenza d’indigens, hosps, agricultura e natira resti harmonia, supplichein nus tuttas possessuras e tuts possessurs da tgauns instantamein da prender si il cac da tgauns era ordeifer il territori da habitadi (sin praus, sendas da viandar e praus) e da dismetter quel adina els recipients da robidog ch’ein avon maun. Vus prestais aschia ina contribuziun preziusa per la protecziun d’animals da nez e selvaschinas sco era per la schubradad da nossa cuntrada. Bien engraziament per Vies agid.
  • Project d’avegnir – Project d’hotel «La Mutta»
    Ils 25 da fevrer 2026 ha giu liug ella la fermata in’occurrenza d’informaziun davart la “planisaziun d’areal e regruppament da terren e la procedura da cooperaziun suandonta en connex cul project d’alloschament La Mutta”. Per la stedia participaziun alla procedura da cooperaziun lein nus engraziar. Ils resultats vegnan ad esser avon maun las proximas jamnas. Sper las biaras inoltraziuns constructivas ei deplorablamein era vegniu inoltrau ina protesta encunter il plan d’areal che astgass retardar vinavon il project. Nus tenin bugen sil current davart ils proxims craps da miglia ed ils proxims pass da planisaziun.
  • Informau direct & spert – Il canal da WhatsApp dalla vischnaunca da Falera
    Suonda nies canal da whatsapp public «Vischnaunca – Vischnaunca Falera». Scannen Sie einfach den QR-Code hier, auf unserer Website oder suchen Sie direkt in WhatsApp nach unserem Kanal, um immer bestens informiert zu sein. En quel communichein nus novitads impurtontas e communicaziuns a cuorta vesta.
  • Highlights culturals – Program d’unviern el Center cultural «la fermata»
    Selegrei era la stagiun d’unviern vegnenta sin in program variont en nies Center da cultura e sentupada la fermata. Da musica tochen art pign ei per mintga gust enzatgei. Il program actual sco era bigliets anfleis Vus sut www.lafermata.ch. Nus selegrein fetg sin Vossa viseta!
  • Uras da menaschi sutgera Falera – Curnius
    Stad 2026
    Menaschi quotidian
    26 da zercladur – 16 d’uost 2026
    10 d’october – 25 d’october 2026
    Menaschi da fin d’jamna
    22 d’uost – 04 d’october 2026
    Unviern 2026/27
    Menaschi da fin d’jamna
    28 da november (cundiziunau da neiv) – 13 da december 2026
    Menaschi quotidian
    18 da december 2026 – 21 da mars 2027
    Menaschi da fin d’jamna
    26 da mars – La fin dalla sesiun vegn aunc determinada dallas pendicularas.

 

Informaziun plazzal – Val da Cafegns
Adatg: Traffic da plazzal
En connex cun las lavurs da construcziun dil rempar digl ual Val da Schluein eis ei da quintar cun traffic da plazzal sin la Senda Sursilvana denter Falera e Ladir naven da gliendisgis, ils 17 d’uost 2026.
Nus supplichein tuttas viandontas e tuts viandonts sco era velocipedists dad esser pli precauts e prender risguard el sectur dils plazzals.
Fueina Cafegns
La fueina Cafegns resta serrada duront las lavurs da construcziun.
Nus engraziein per Vossa capientscha e supplichein da risguardar la signalisaziun sil plaz.
Scamond absolut da far fiug

Muort la schetgadad dil davos temps ei il prighel da fiug fetg gronds. Las prognosas d’aura pils proxims dis vegnan probabel buca a midar enzatgei vid quella situaziun. Igl uffeci d’uaul e prighels dalla natira dil cantun Grischun ha perquei gia relaschau en pliras regiuns dil Grischun in scamond absolut da far fiug el liber pil territori buca habitau.

Sin fundament da quei relasch ha la suprastonza communala da Falera era relaschau naven d’immediat e tochen dacheu in absolut scamond da far fiug per il territori da habitar. Cun ina sluccada dalla situaziun ei da quintar per suenter plievgias abundontas sur plirs dis.

Per donns che seresultan entras surpassaments dil scamond da far fiug ei mintga persuna sezza responsabla. Egl interess da nus tuts, supplichein nus da setener vid quellas prescripziuns.

Communicaziuns actualas ed informaziuns pertuccont il prighel d’incendis d’uaul e scamond da far fiug anfleis silla pagina d’internet www.wald.gr.ch.

 

Fegl d’informaziun – Finanziaziun da vias publicas ella procedura da contribuziun

Fegl d’informaziun