Publicaziuns ufficialas

Cheu anfleis vus las actualas publicaziuns ufficialas dalla vischnaunca da Falera.


Decisivs per termins da far protesta ei denton sulettamein il datum dalla publicaziun egl organ da publicaziun ufficial dalla vischnaunca da Falera, il Fegl ufficial Regiun Surselva.








Votaziuns dils 28 da settember 2014

Nus fagein attents sin la publicaziun all'entschatta dil fegl ufficial.

L'urna ei tschentada sin canzlia communala sco suonda:

gievgia, ils 25 da settember 2014    15.00-17.00 uras
venderdis, ils 26 da settember 2014    15.00-17.00 uras
dumengia, ils 28 da settember 2014    09.45-10.15 uras


Il cedel da dretg da votar (cedel alv) ei da dar giu all'urna.

Votantas ni votants che han buca survegniu tarmess tier il material da votar, san retrer quel entochen venderdis, ils 26 da settember 2014 tier la canzlia communala.







Localitads d'ustria egl Observatori Mirasteilas

Sin la sesiun d'unviern 2014/15 lai la vischnaunca da Falera a tscheins las

localitads d'ustria egl
Observatori Mirasteilas


La/s persuna/s che pren/dan a tscheins las localitads meina/n sin sesez e sin agen quen il menaschi d'ustria a Chinginas. Il menaschi d'ustria cuozza naven da ca. miez december entochen la fin dalla sesiun d'unviern. L'ustria sto esser aviarta mintga di duront il menaschi dil runal d'affons mintgamai naven dallas 09.00 uras entochen las 16.00 uras.

Persunas ch'ein interessadas da prender a tscheins las localitads e da surprender il menaschi d'ustria a Chinginas san s'annunziar a scret entochen ils 19 da settember 2014 tier la suprastonza communala, Via Principala 45c, 7153 Falera.

Per ulteriurs sclariments stat il president communal, Wendelin Casutt-Cathomen (Tel. 081 921 35 15, E-Mail: wcasutt@falera.net) bugen a disposiziun.







Tagliar plontas e caglias

Tenor artechel 21 dalla lescha da baghegiar dalla vischnaunca da Falera supplichein nus tuts proprietaris da terren da tagliar anavos caglias e roma che vargan ora en vias publicas, sinaquei ch'il traffic e la rumida da neiv vegnien buca impedi. Nus supplichein era da risguardar che cazzolas e signalisaziuns da via sco era hidrants eav. ein da deliberar da caglias e roma.

Las caglias e roma sco era ulteriuras emplontaziuns (cotoneaster eav.) ein da tagliar anavos sin in'altezia da 4.5 m sur via e cun ina distanza da minimum 50 cm naven dalla via communala.

Nus supplichein privats, administraziuns e pedels da casas da vacanzas da mirar che quellas lavurs vegnan exequidas entochen ils 31 d'october 2014.

Suenter quei termin vegnan ils luvrers communals a far las lavurs necessarias sin cuosts dils proprietaris. En cass che las lavurs san buca vegnir exequidas entras ils luvrers communals vegnan quellas surdadas ad ina fatschenta dil contuorn. Era quels cuosts ston vegnir surpri mintgamai dils proprietaris pertuccai.







Tagliar plontas e caglias suenter las vias da meglieraziun

Tenor artechel 4 a) dil reglament pil manteniment dallas ovras da meglieraziun dalla vischnaunca da Falera ston tut las scarpas per liung dallas vias da funs vegnir cultivadas gratuitamein dil cunfinont (segar, tagliar caglias e roma etc.).

Nus supplichein perquei tuts possessurs da terren da mirar che plontas e caglias seigien tagliadas anavos aschia che quellas creschan buca sur ils cunfins ellas vias da meglieraziun. Quellas lavurs ston vegnir exequidas entochen ils 31 d'october 2014.

Suenter quei termin vegnan ils luvrers communals a far las lavurs necessarias sin cuosts dils proprietaris. En cass che las lavurs san buca vegnir exequidas entras ils luvrers communals vegnan quellas surdadas ad ina fatschenta dil contuorn. Era quels cuosts ston vegnir surpri mintgamai dils proprietaris pertuccai.



 





Publicaziuns fegl ufficial cantunal


http://www.kantonsamtsblatt.ch