Radunonzas/Votaziuns
Radunonzas communalas
La davosa radunonza communala ha giu liug ils 11-12-2009
Tractanda 2
Orientaziun sur il stan dil project "Scola futura Laax - Falera"
Las sfidas per las scolas creschan ad in crescher e semidan continuadamein. Las pretensiuns arisgaurd la qualitad dalla scola vegnan pli grondas e quei tier in diember d'affons che va plitost anavos enstagl da crescher. Sut quels aspects examineschan las vischnauncas da Laax e Falera ina cooperaziun pli stretga era sil scalem dalla scola primara. La populaziun ei vegnida informada sur ils pass instradai e la lavur fatga tochen dacheu. Tractanda 3
Constataziun dall'approbaziun dil protocol dalla radunonza communala dils 12-06-09
Dil protocol sura numnaus ha la populaziun saviu prender investa sin canzlia communala. Tiel protocol ei vegniu inoltrau neginas propostas per midadas. Il protocol vala tenor artechel 25 dalla constituziun da vischnaunca cun quei sco approbaus.
Tractanda 4
Presentaziun ed approbaziun preventiv 2010
Il preventiv preveda tier expensas da frs. 4'561'900.-- ed entradas da frs. 4'620'440.-- in surpli d'entradas da frs. 58'540.--. Risguardadas ein amortisaziuns ordinarias e reservas per aua e canalisaziun da frs. 387'650.--. Per gl'onn che vegn vegn quintau cun investiziuns netto da frs. 976'000.--.
Il preventiv 2010 vegn approbaus cun grond surpli.
Tractanda 5
Fixar il pei da taglia per 2010
a) Taglia sin gudogn e facultad
b) Taglia sin schischom
Il pei da taglia sin gudogn e facultad resta sin 75 % dalla taglia sempla cantunala. Il pei da taglia sin schischom resta sin 1.25 ‰ dalla valeta fiscala.
Tractanda 6
Presentaziun project paralavinas e rempar encunter crappa Alp Dadens Sura e damonda da credit
Il project preveda la stabilisaziun dil grep problematic e la montascha da duas retschas lavineras permanentas en fuorma da reits. Il project vegn approbaus dalla radunonza. Ei vegn concediu in credit brut da frs. 165'000.-- persuenter.
Tractanda 7
Presentaziun dil project lavurs da manteniment per vias d'uaul e damonda da credit
Il project preveda la sanaziun dalla cuvrida e differentas ulteriuras lavurs da manteniment sin la via d'uaul da Cafegns e la via d'uaul Ruinauls - Platta Grischa. Il project vegn approbaus ed il credit brut da frs. 520'000.-- vegn concedius.
Tractanda 8
Decisiun da cooperaziun cun la scola da talents Surselva
La radunonza communala beneventa ina scola da talents a Glion e decida da cooperar cun quella. Egl avegnir san affons talentai e qualificai frequentar la scola da talents a Glion. La vischnaunca da Falera vegn a surprender ils cuosts pesuenter.
Tractanda 9
Zona d'indigens Er Liung: Damonda da dar giu ina parcella en dretg da baghegiar
La damonda vegn lubida ed il dretg da baghegiar vegn concedius ad ina famiglia.
Tractanda 10
Damonda pil consentiment da reorganisar gl'uffeci da baghegiar
Muort midadas persunalas tiegl uffeci da baghegiar ei ina reorganisaziun da tal uffeci necessaria per 01-07-2010. Alla proposta dalla suprastonza da surdar lavur administrativa digl uffeci da baghegiar cun in cuntract da mandat ad ina fatschenta privata vegn dau suatientscha.
Allas 21.45 uras siara la presidenta communala la radunonza.
Votaziun dils 7 da mars 2010
Resultats dalla votaziun- Resultats Vischnaunca Falera
Votaziun federala
Votaziun cantunala - Resultats ulteriur cantun