Baselgia
Pleiv catolica da Falera
Beinvegni en nossa pleiv.
Circa 465 cristians catolics che stattan a Falera fuorman la pleiv da Falera. Cunzun duront la stagiun d'unviern e da stad, mo era duront igl entir onn, ein biars hosps digl entir mund tier nus. Nus fagein a tuts in cordial beinvegni en nies vitg, cunzun denton era en nossa cuminonza cristiana. Nus sperein ch'els sesentien bein tier nus e ch'els astgien resentir in ton patria e segirezia en la cardientscha communabla.
Il lungatg da nossa cuminonza dil vitg ei il romontsch. Entras l'immigraziun e naturalmein en consequenza da nos hops ei denton era il tudestg daventaus in lungatg impurtont. Il lungatg el survetsch divin ei cunzun il romontsch. Responsabels per la pleiv ein sur Peter Aregger e sora Valentina Spescha. Els habiteschan en casa pervenda a Laax. La pervenda da Laax ei ligiada stretgamein cun la pleiv da Falera. Laax e Falera fuorman ina cuminonza da pastoraziun.
Il fegl parochial che cumpara mintga meins ei il ligiom en la pleiv. El orientescha davart il temps ed il liug dils survetschs divins e dat informaziuns impurtontas. Nossas fiastas e festivitads religiusas e la cuminonza dalla pleiv vegnan sustenidas dalla cooperaziun dil Chor viril baselgia, dalla Societad da musica da Falera sco era dall'Uniun da giuventetgna, dalla gruppa da ministrants e da biars survetschs voluntaris dils fideivels.
Nossa cuminonza dalla pleiv celebrescha sia cardientscha en l'eucaristia e sesprova da realisar ella en la carezia proximala vivida. Nus essan buca mo interessai dil beinstar dils indigens, mobein essan aviarts era per Vus, cars hosps da vacanzas. Nus selegrein da saver beneventar Vus el survetsch divin ni a caschun d'autras occurrenzas dalla pleiv ed envidein perquei Vus tuts cordialmein.
La baselgia da sogn Rumetg
Ina bellezia allea da gliendas ed ischals meina naven dil vitg si encunter la baselgia da sogn Rumetg. Quella venerabla baselgia ord il 15avel tschentaner ei vegnida baghegiada sin ina grondiusa terrassa panoramica ed adattada admirablamein al contuorn. Per glieud dil fatg vala quella baselgia per in dils pli bials ed interessants monuments historics en la Val dil Rein Anteriur. Sco noda caracteristica da Falera ornescha ella medemamein igl uoppen da vischnaunca ed ei veseivla da lunsch en la vallada.
Altar baselgia S. Rumetg Baselgia da S. Rumetg
La baselgia dil sontgissim Cor da Jesus
La baselgia dil sontgissim Cor da Jesus sesanfla amiez il vitg. Ella ei vegnida baghegiada ils onns 1903/04.
Baselgia dil sontgissim Cor da Jesus sper il Center communal
Material d'informaziun
Il cudischet "Falera - St. Remigius" cun descripziuns detagliadas dalla baselgia e dil contuorn dalla Mutta san ins retrer tier la suandonta adressa:
Flims Laax Falera Tourismus AG
Biro d`informaziun Falera
Center Communal
7153 Falera
Tel. 081 921 30 30
Fax 081 921 48 30
Reservaziun baselgia da S. Rumetg per nozzas
Sur Peter Aregger
Casa Pervenda
7031 Laax
Tel. 081 921 69 60
Fax 081 921 51 11
Email aregger.peter@bluewin.ch
Homepage http://www.pleiv-laax-falera.ch
Reservaziun fueina per aperitiv da nozzas
Administraziun communala Falera
Center Communal
7153 Falera
Tel. 081 921 35 15
Fax 081 921 41 31
Email info@falera.net
Adressas da contact
Uffeci parochial catolic
Uffeci parochial Falera
Casa Pervenda
7031 Laax
Tel. 081 921 41 12
Fax 081 921 51 11
Email kath.kirche.laax@bluewin.ch
Homepage http://www.pleiv-laax-falera.ch
Sur Peter Aregger
Tel. 081 921 69 60
Sora Valentina Spescha
Tel. 081 921 41 12
Uffeci parochial evangelic
Uffeci parochial evangelic
Encarden
7152 Sagogn
Tel. 081 921 68 55